أمين زيادات يَكتب: يا رّيت ضلّينا زغّار..؟!!

أخبار الأردن-نبراس نيوز- بقلم أمين زيادات.. يا ريت ضلّينا زغار لا همّ ولا مسؤولية…………. يا ريت ضلّينا زغار نعمل إللي بدنا إياه ويقولوا اتركوهم زغار.

يا ريت ضلّينا زغار كل تفكيرنا باللعب والأكل والسمسميه……… كنّا زغار وكنّا نستنى العيد عشان نجّمع دينار عيديه ونلعب فيها بالحارة على المرجيحية.

كبرنا وصار العيد علينا همّ……………. والدينار إللي أخذناه صار لازم نسدّو ميّة، والمرجيحة اللي كنّا نلعب فيها صارت هيّه تلعب فينا من همّ لَهَمّ.

كنّا زغار وما كنّا نعرف الكذب والنفاق………….. صرنا كبار وصار الكذب والنفاق لزوم الحياة ولزوم الصداقة والاتفاق.

كنّا زغار وكان الحب فيه حنيّة و بساطة وبراءة وكان وجهنا يصير أحمر اذا حكت معنا صبية،………….. كبرنا وصار الحب كذبة ومصلحة والحنية والخجل ما عاد اله وجود.

كنّا زغار وكنّا نتقاسم مع بعض اللقمة،……….. كبرنا وصرنا نسرق من بعض كل لقمة، كنّا زغار وكانت من القلب الضحكة تطلع، كبرنا وصارت حتى ضحكتنا كذبة.

كنّا زغار وكنّا نجتمع على الأكل العيلة كلها ببساطه وحب وحنيّة،……… كبرنا وصرنا نجتمع على الأكل عشان نتصور بدون مشاعر ولا حب ولا اي علاقة عائلية.

كنّا زغار والجار يساعد الجار و نعرف كل واحد بالحارة،…….. كبرنا وصار الجار ما يعرف الجار والحارة صارت عمارة.

كنّا زغار وكنّا نخاف من المعلم والمعلمه…………. كبرنا وصارت المعلمه والمعلم همّه يخافوا منّا.

كنّا زغار وكان زمان الأخوان بحبّوا بعض،……….. كبرنا وصارت نسوان تعبّي روس الإخوان على بعض و صرنا نصدّق النسوان ونكذّب بعض.

كنّا زغار وما أحلى هذيك الأيام بقسوتها وبساطتها،……… كبرنا وصار تعبها وهمّها بسهولتها.

كنّا زغار وكان إلنا كبير…….. كبرنا والزغير بهل زمان صار هو الكبير.

كنّا زغار وأصحابنا زمان بعدهم صحابنا…….. كبرنا وكلها مصالح وما عاد تقدر تعمل أصحاب.

كنّا زغار وكنّا لمّا نطبخ نطعمي الجيران والجيران يطعمونا، كبرنا وصرنا نطبخ عشان نتصوّر ونزّل على الفيسبوك والجار الفقير والجيعان يتفرّج علينا.

كنّا زغار وكان عنّا أخلاق وكان في شي اسمه عيب وكنا نستحي ونخجل، كبرنا وما عاد في أخلاق وما عاد حدى يستحي وما في اشي اسمه عيب.

كنّا زغار، بس كنّا كبار…. كنا زغار بس كنا كبار ……. يا ريت ضلّينا زغار، يا ريت ضلّينا زغار؟؟!!

** مقال كتب قبل 5 سنوات